Ваш браузер устарел. Рекомендуем обновить его до последней версии.

православный календарь

2024

Краегранесие(стих, составляемый первыми буквами тропарей канона.) Верне тя пою, мучениче пресветле.

Глас 4-й

Песнь 1

Ирмос: Тристаты крепкия, / Рождейся от Девы, / безстрастия во глубине души тричастное потопи, молюся, / да Тебе, яко в тимпане, / во умерщвлении телесе / победное воспою пение.

Припев: Святый мучениче Вонифатие, моли Бога о нас.

 Усердным помыслом подвигом ревновав доблих страдальцев, / пострадал еси крепко и змия умертвил еси страдании твоими живоносными, / страдальче Вонифатие, святых Ангелов собеседниче.

 Видев на земли вражию лесть, излиянну люте, доблии страдальче, / душу распалив желанием Божественнейшим, / вшел еси в тризнище небоязненным, треблаженне, мудрованием.

 Слава: Мудростию Божественною просвещаемый, блаженне, / немудрыя враги объюродил еси, Христа возвещая, / дебельством плоти уподобльшася, имже явитися восхоте,/ Вонифатие, мучениче многостраданьне.

И ныне: Гору Божию, юже провиде Даниил, / скинию мысленную, Марию Чистую, славы священие, / трапезу, Божественный хлеб вмещшую, / вси вернии единомудренно воспоим.

Песнь 3

Ирмос: Яко неплоды роди от язык Церковь, / и многое в чадех изнеможе сонмище, / чудному Богу нашему возопиим: / свят еси, Господи.
 Якоже возжелел еси, славне, свободу вышнюю, / от ига работы избавляешися, / страстем честным поревновав, славне, / Иже за милосердие раба бывшаго.

 Плотских высший явлься мудрований изменением Божественным, / внезапу всяк прилог лютых претерпел еси, радуяся, / мучениче Вонифатие.

Слава: Тебе самаго отверглся еси / и к подвигом и борением врага изшел еси, / Креста оружием укрепився, / и, победитель быв, / прославился еси, мучениче Вонифатие.

И ныне: Себе Самаго истощи, / Отеческих не истощив во чреве Твоем недр, пресущный Бог / и Твой Сын бысть, Всенепорочная, / спасая человечество.

Кондак, глас 4-й

Подобен: Вознесыйся:
 Изыде к приятию страстотерпческих мощей и, страждущих законне веры ради зрети, / показал еси мужески крепость свою, / устремився на страсти исповеданием Христовым. / Иже прием почесть победы твоего страдания, / Вонифатие, присно моли за ны.

Седален, глас 4-й

Подобен: Вознесыйся:
 К сословию послан мучеников, мученик был еси истинен, / пострадав за Христа крепчайше, всехвальне; / бремя же, блаженне, отдался еси верою пославшей тя, Вонифатие блаженне; но прилежно моли прияти всем согрешений совершенное прощение.

Слава, и ныне, Богородичен:
 Грехолюбив сый, молю Тя, безгрешнаго Бога рождшую, / вземлющаго грехи мира, Пречистая, / многогрешную душу мою ущедрити / и грехи моя многая очистити: / грешным бо Ты еси очищение и спасение верным, и заступление.

Песнь 4

Ирмос: Любве ради, Щедре, Твоего образа / на Кресте Твоем стал еси, / и растаяшася языцы: / Ты бо еси, Человеколюбче, / крепость моя и хваление.
 Ублажая страждущих терпение, / подобием, мучениче, честных страданий / сим уподобился еси, богомудре пребогате.
 Идый верою к мучеников Божественному сословию, блаженне, / тебе самаго желающей бремя досточудное, богомудре, отдал еси.

Слава: Очищен, якоже злато, мучениче, язв горнилом,/ чистейший явился еси, / нося Зиждителя страстей изображение.

И ныне: Девство по рождестве запечатанно познавающи, Отроковице, / несказанно рожденнаго Слова из боку Твоею верно величала еси.

Песнь 5

Ирмос: Просвещение Твое, Господи, низпосли нам / и от мглы прегрешений разреши ны, Блаже, / Твой мир даруяй.
 Яко светозарная возшел еси звезда от запад / и зашёл еси, мучениче, страданьми терпеливно, / абие к западом возсиял еси, озаряя концы.
 Мученически подвизался еси, / ногтей терзания, острыми, мучениче, тростьми сбодаем, / и лукаваго жала верно притупляя благодатию.

Слава: Вражия изнемогоша, богомудре, на тя коварствия, / ибо к Богу воззрением неуклонным / плотския раны, якоже безплотен, терпел еси.

И ныне: Скверны всякия омый, Дево, душу мою, вопию Ти, / и спаси мя, Чистая, / Яже истиннаго Бога Спаса на земли воплощшая.

Песнь 6

Ирмос: Возопи, прообразуя погребение тридневное, / пророк Иона, в ките моляся: / от тли избави мя, Иисусе, Царю Сил.
 Биемый, ранами плотскими уязвил еси безбожныя, / неисцельно недугующия неведением, / и болящим явился еси врач, страдальче Вонифатие.
 Возвышаем к Богу, блаженне, прилогом подвигов, / враги невидимыя разразил еси / и низриновенным помощник, страстотерпче, был еси.

Слава: Влачим по земли, якоже камень многоценен, страдальче, / прелести низложил еси утверждение, / верных же сердца наипаче верою утвердил еси.

И ныне: Купина Тя проображаше, Всенепорочцая, первее, / горящи и никакоже опаляема, Пречистая, / ибо, якоже она, не опалилася еси, Бога воплощши.

Кондак, глас 4-й

Подобен: Явился еси:
 Священие непорочное самовольне тебе привел еси, Иже от Девы тебе ради родитися хотящему, / святе венченосче премудре Вонифатие.

Песнь 7

Ирмос: Авраамстии иногда в Вавилоне отроцы / пещный пламень попраша, / песньми взывающе: / отцев наших Боже, благословен еси.
 Колен не преклонив истуканным, / во искушение верглся еси величайшее, истинно, мучениче, в пещь, / в нейже орошаемый, благодарствовал еси Христу во веки.

 Разорити крепость твоего исповедания тщася, / льстивомудренный во внутренняя твоя клокочущее олово немилостивно вливает, / но яве посрамися.

Слава: Посечен быв усердно в честную твою главу, / врага льстиваго многокозненную главу отсекл еси твоего мужества мечем, / мучениче Христов богомудре.

И ныне: Да гласы подобающими песнословлю Тя, Отроковице, / страстей мя избави молитвами Твоими, / бед же и скорбей и лукавых человек, / озлобити мя ищущих.

Песнь 8

Ирмос: Избавителю всех всесильне, / посреде пламене благочествовавшия, / снизшед, оросил еси / и научил еси пети: / вся дела, благословите, поите Господа.

Полезно твое делая спасение, Христос, Вонифатие, / взыскающа мощей добропобедных мучеников, тя укрепляет, / еже верно взыскал еси сам быти.

 Блаженней госпоже блаженно сокровище подался еси, блаженне, / имже обогатившися, пояше веселым сердцем: / вся дела, благословите, пойте Господа.

 Со тщанием славная жена, воздвигши храм священнейший, / тя в нем положи, сущий Божественныя Троицы храм, / страстотерпче Христов Вонифатие.

Слава: Умертвився за любовь Зиждителя, умерщвляющаго страсти тлетворныя, / оживотвори молитвою твоею ясно вопиющия: / вся дела, благословите, пойте Господа.

И ныне: На Тя, Чистую, Пребожественный низшед, якоже весть, / воплотися и человеки обожи, песнопоющия, Дево: / вся дела, благословите, пойте Господа.

Песнь 9

Ирмос: Ева убо недугом преслушания / клятву вселила есть; / Ты же, Дево Богородице, / прозябением чревоношения мирови благословение процвела еси. / Тем Тя вси величием.

 Видевши тя бремя священное, радовашеся, вопиющи, приснопомнимая: / раба послах тя, блаженне, господина истинна приемлю, / работы мя зол избавляюща твоими благоприятными мольбами.
 Яко крин, во удолиих мысленных процвел еси мучеников, Вонифатие, / якоже финикс, возвысился еси, / яко кедр, познался еси миродыханен, / явился еси избранный, яко кипарис, / благовонствуя души наша.

 Днесь память твоя нам возсия, страстотерпче, / якоже солнце, сиянием Божественных дарований, / просвещающи души поющих тя, страстей же мглу отгоняющи, / мучениче богомудре всеблаженне.

Слава: Яко солнце от запад возсиял еси / и восточнаго града достигл еси, / идеже пострадав и смертию зашед, к жизни востекл еси / и Рим светлый достигл еси, / сего ограждая мольбами твоими.

И ныне: Светом мя озари Твоим, всенепорочная, / во тьме содержимаго греховней, Богородице, / и подаждь во дне ходити Божественных повелений, Богоневесто, / яко да пою Тя, всепетую.

Молитва
 О святый страстотерпче Христов, воине Царя небеснаго, земная сладострастия презревый и к горнему Иерусалиму страданием возшедый, мучениче Вонифатие!
 Услыши мя грешнаго, приносящаго от сердца молебная пения, и умоли Господа нашего Иисуса Христа  простити вся моя согрешения, в ведении и в неведении мною содеянная. Ей, мучениче Христов, образ покаяния собою показавый грешным! Буди ми на злаго сопротивника диавола твоими молитвами к Богу помощник и заступник; много бо поревахся избегнута сетей его лукавых, но удицею греховною уловлен и крепко влачим от него, не могу избавитися, аще не ты предстанеши ми, во обстояниих горькая терпящему; и колико покушахся покаятися, но ложь пред Богом бых. Сего ради к тебе прибегаю и молюся: спаси мя, святче Божий, от всех зол твоим предстательством, благодатию же всесильнаго Бога, в Троице Святей славимаго и покланяемаго, Отца и Сына и Святаго Духа, ныне и присно и во веки веков. Аминь.